تختاري لبسك إزاي على حسب شكل جسمك
بتقابلك مشكلة اختيار لبس مناسب؟ ومش بتكوني عارفة ايه اللبس اللي يخلي شكلك أحلى ويكون مناسب ليكِ وشكل جسمك!
أكيد عارفة إن كلنا مختلفين، وكل بنت أو ست جسمها مختلف عن غيرها، عشان كده مهم جدًا تعرفي شكل جسمك عامل ازاي وبالتالي تقدري تحدد الأنسب والأحلى بالنسبة لكِ وفي نفس الوقت يكون متماشي مع الموضة وشكله تريندي.
الدراسات وخبراء الموضة وأطباء التغذية العلاجية قسموا شكل الجسم للستات أربع أنواع تقريبًا:
- الجسم التفاحة أو الفراولة أو المثلث المقلوب.
- الجسم الكمثري
- الجسم المماثل للساعة الرملية
- الجسم المستطيل أو الموزة.
وقالوا إن أي بنت في الدنيا أكيد هيكون جسمها واحد من الأربع أنواع، لكن ايه هى مواصفات كل نوع منهم؟ وازاي تحددي اللبس المناسب ليكِ حسب شكل جسمك عشان تكوني واثقة من نفسك وحاسة بالراحة.
الجسم التفاحة أو الفراولة
النوع ده يعتبر خاص بالسيدات والبنات الممتلئات شوية من منطقة الصدر والكتفين، وفي نفس الوقت حجم الجسم بيكون أقل وأصغر في المنطقة السفلية والفخذين.
الملابس المناسبة لجسم التفاحة
- في الحالة دي بيكون أكثر لبس مناسب ليكِ هو اللبس الأسود والألوان الغامقة خصوصًا في الجزء الأعلى من جسمك سواء كان بلوزات، قمصان، شيميزات.
- الجزء السفلي تقدري تلبس فواتح بسهولة و فساتين على شكل حرف A بحيث تكون ضيقة من الخصر وواسعة من تحت.
- مهم جدًا تبعدي عن الألوان المزخرفة والمنقوشة بشكل زائد في الجزء العلوي في الفساتين والبلوزات.
- تقدري تلبسي حزام عريض عشان يبان الخصر أرفع.
- استعيني باكسسوارات فاتحة عشان تخلي استايل اللبس أشيك.
الجسم الكمثرى
أهم مواصفات هذا النوع إن الخصر أو الوسط والمؤخرة بيكونوا ممتلئين أكثر من منطقة الصدر والكتفين، وده النوع الأشهر في البلاد العربية.
صاحبات النوع ده دائمآ بيشتكوا من عدم وجود لبس مناسب، أو إنهم مش قادرين ينسقوا اللبس بطريقة تخلي شكلهم حلو وجسمهم متناسق، ودايمًا حاسين إن مفيش أي حاجة تريندي تليق عليهم وإنهم بُعاد جدًا عن الموضة.
الملابس المناسبة لجسم الكمثرى
تعالي نعرف ايه اللبس المناسب ليكِ ومهم تاخدي بالك من ايه وانتي بتنسقي لبسك لو كان جسمك من النوع الكمثري
- للمنطقة العلوية من جسمك اختاري ألوان فاتحة منقوشة بزخرفة تشد العين.
- استخدمي حمالة صدر من النوع Push up عشان تعملي تناسق بين الجزء العلوي والسفلي في جسمك.
- الملابس Oversize اختيار مناسب في حالتك عشان تعمل تناسق لجسمك.
- الأكمام المرتفعة واكسسوارات الرقبة العريضة هى الاختيار الأمثل ليكِ لأنها بتشد الانتباه، وتلفت النظر لها وبالتالي هتساعدك تبعدي عن الأنظار عن الجزء الممتلئ.
- في الجزء السفلي اعتمدي على الملابس الغامقة اللي هتساعدك تُظهري الجزء ده من جسمك بشكل أصغر وأرفع.
- ابعدي تمامًا عن البنطلونات والتنانير الضيقة لأنها هتوضح إمتلاء الجزء ده.
الجسم المماثل للساعة الرملية
الجسم الأكثر أنوثة، الملئ بالتفاصيل والتوازن بين الصدر والأرداف مع وجود خصر أنثوي محدد، وبالتالي إظهار جمالك أمر بسيط وعندك اختيارات كثيرة.
الملابس المناسبة للجسم المماثل للساعة الرملية
- ركزى على الملابس اللي تلفت الانتباه لخصرك واستخدام الحزام العريض اختيار مميز.
- ابعدي عن الملابس الفضفاضة والواسعة بشكل زائد لأنها هتخلي شكلك مش متناسق.
- اختاري حمالة صدر مناسبة لمقاسك عشان يكون شكل جسمك متناسق.
- متختاريش ملابس فيها تفاصيل كثير وزخرفة وكشكشة لأنها هتبين جسمك ممتلئ أكثر.
الجسم المستطيل أو الموزة
النوع المشهور لعارضات الأزياء ولاعبات الرياضة، جسم دون ثنيات، الجزء العلوي مماثل تقريبًا للجزء السفلي، وهنا بالرغم من إنه جسم رياضي الا إن إبراز جماله بيحتاج تركيز ومجهود وصاحبات النوع ده أوقات بيحسوا إن جسمهم مش أنثوي، لكن الحقيقة إنه بمجهود قليل هتقدري تُظهري أنوثتك وجمالك.
الملابس المناسبة للجسم المستطيل أو الموزة
مهم جدًا وإنتِ بتختاري لبسك، تختاري اللبس اللي يُظهر وسطك أو خصرك بمنحنيات أنثوية، عشان كده اللبس اللي فيه تموجات هو أفضل اختيار.
- استخدمي الأحزمة تحت الصدر مع بلوزات أو جواكيت واسعة عشان تحددي منطقة الخصر.
- الملابس العلوية اللي فيها تفاصيل زي الجيوب والنقوشات والكشكشة هتساعدك على إبراز منطقة الصدر بشكل أنثوي جميل.
- موضة القميص القصير أو Crop top اختيار رائع لكِ وخصوصًا لو كنتِ طويلة.
- ابعدي عن الفساتين ذات اللون الواحد أو الضيقة من فوق لتحت أو ملتصقة بجسمك لأنها ستُظهرك بمظهر رجالي.
- الجينز الواسع من أسفل الركبة والتنانير المنقوشة تعطي جسمك طلّة ناعمة.
معرفة شكل جسمك أمر مهم، لأنه بيساعدك تظهري بطلّة حلوة، وهتلاقي مساحة تعملي فيها ستايلك الخاص اللي يخليكي على طبيعتك، ومهم جدًا وانتِ بتشتري تتأكدي من مقاسك بدقة، عشان تضمني لوك أنيق وجميل، الفيديو ده هيساعدك وهتعرفي من خلاله ازاي تاخدي مقاساتك بشكل دقيق.
في النهاية أيًا كان شكل جسمك أو مقاسك، فأنت حلوة في كل حالاتك، ولازم تحبي نفسك وتتقبلي شكلك وتكوني واثقة إنك جميلة ووقتها من غير أي مجهود كل اللي حواليكِ هيشوفوكِ جميلة.
